一次難忘的經驗

2011年4月24日

這次沒有跟大隊行山, 我是同一班體育館朋友出發,

地點是從北潭凹至較流灣.

話說有一日, 友人拎住一份報紙, 那是介紹
較流灣的海鮮、風景和古建築等, 上面圖文並茂, 
非常吸引,報紙上的簡單地圖只有四個點, 
北潭凹起步經赤徑過蚺蛇坳

直落較流灣.

這是我後來從網上找來的路線圖, 北潭凹至較流灣,

跟報紙的有出入, 咁就出事喇!

我行北潭凹至赤徑出黃石好多次, 今次有新路線
當然要試啦! 又有報紙又有圖示;

(這張圖是我回家後, 借來檢討的).

在北潭凹開步例牌在山上影到的黃石風帆會

不到一小時便到了赤徑

這段路好適合一家大小郊遊的

出赤徑入村

赤徑碼碼風景一流

沿小路直上見到青年營的小白屋

再靠小路一直走

好快來到營地, 友人說在報紙上有話...在這裡要找出

隱蔽的三叉路靠北行?! 唔識喎...剛好前面行來

一個全副裝的行山人, 於是友人前往請教, 

武裝人話這路線未行過好有興趣, 他便放下行裝, 

二話不說一人上山替我們探路去了.

我當然又在利用時間打蝶忙喇! 眼見武裝人

連走帶跑穿梭於樹叢之間, 真了不起啊!

20分鐘後武裝人對友人說前面的確有幾條山路, 

可能靠左的一條似, 但不肯定; 他說:『祝我們好運, 

看你們可能會唔夠水啊!』這樣便走了.

橫掂來到都要試吓啦! 一於心口寫個勇字照上.

一入林便是沙頭地區, 碎石小路也不難走.

出沙頭原本要上蚺蛇坳再靠左落的, 點知有人聽到

上蚺蛇坳便起哄了...乜唔喺靠北行咩? 

我一味同賴sir在打蝶, 只聽沒有出聲, 

人在山中要聽大夥兒的話啊!

就是這樣又往山中向下走, 當時要撥開野草才可見路, 

不知走了多久, 我覺不對勁時, 已身陷險景了; 

記得隊長說過這是以前游擊隊行出來的小路, 

真的好險一邊是山, 另一邊是斜坡.

站在無人地帶, 眼看對面的蚺蛇坳, 離我那麼遠, 

心中開始有點怕走不出去.

這裡是一個路標都找不到, 只好影吓對面山的發射站,

 如果走那邊就對了, 如今開頭已經是錯了, 

唯有死撐啦! 我開始不作聲...一味行...

c喇! 落咗谷底...於是又努力地去找往上的路, 

因為只有在高處才可見清楚地勢啊!

經過這一段密林再回到山上,  在高處向前看到的是

南中國海, 大鵬灣都盡收眼底.這時候我跟賴sir同時

停下什麼都不拍了, 一心就要找出路, 

洪仔也跟我們分頭行事, 他找到向左上山有路, 

但賴sir看見對面落山有路.

眾人商量後決定向落海方向走, 我依舊行最後, 

當我正要轉灣時, 前面傳來話冇路行, 只有水管...

我說冇錯喇...爬水管落, 但其中行頭的幾位

可能冇經驗, 唔得呀! 一定要回頭...

請看又喺幾驚人的, 但是沿水管落去便有人家, 

這是定律啊! 最終都是放棄收場.

這時又要爬回高處, 我好唔開心, 又冇氣, 又冇水, 

又攰; 幸好前方走來兩個人, 大喊問之下...

們是從較流灣行上來的, 回路是北潭凹; 

眾人大喜有人帶我們出生天喇!

又證明我同賴sir看到的路是對的, 

但有長者同行他們怕也是對的. 

只好跟行山者走回頭路.

誰知道一轉個彎在同一地點, 但是完全不同格局,

 是眼前出現一條水管徑, 那麼我們剛才走的那條路呢? 

真的不知去向, 好神奇啊! 又有人在議論紛紛喇!

這時我開始鬧情緒, 如果堅持的話已在目的地途中了,

 現在要走回頭, 條氣唔順, 雖然走錯路浪費

了兩個多小時, 但找不到結果, 有人因怕天黑而放棄, 

我是有點不甘;

我開始小姐病發作, 坐在地上不肯走, 我要在山中過夜, 

你們不用理我, 真的太累了, 我要瞓一陣...

你們看看水管路段要上斜一小時(行山人說的) 

你話c未, 本來落到海邊有海鮮食, 又有坐船回西貢, 

現在走番轉頭, 我快c喇!

話雖如此有三位戰友陪我發瘟, 又給我加水打氣, 

終於走回正道, 來到了蚺蛇坳, 那幾位心急回家的人, 

開心到不得了, 好囉! 唔使打電話求救喇!

來到這裡盲都識得行啦! 有人叫行快d, 話就快天黑, 

那時5:24分有排啦! 我叫佢行先, 唔使等, 

我要在此過夜, 我又停下來! 激c那些心急人.

*沿蚺蛇坳一路下山, 風光如畫, 即時一洗累氣,

途中遇到三位年青人, 他們是來教會渡假營的, 

見到前面的幾位長者, 他們好好心, 一路伴著他們下山, 

有兩位還打電話叫船載我們回黃石碼頭.

**其中一位是物理治療師, 他聽我說唔掂, 又話唔想行, 

又話就死咁! 佢就問我, 你有冇暈呀! 『冇』, 

有冇想嘔呀? 『冇, 但好饑囉』! 咁你有冇抽筋呢?

 『三個鐘前抽了一陣, 現在冇』; 

咁! 真喺幫你唔到啊! 你喺冇事o架!

***『跟住眾人說, 你米埋佢啦! 佢發爛渣咋』!  

哈哈哈! 又唔理我繼續行, 我一於在那裡抖了十多分鐘, 

一吓子就追上了他們, 這時候那位治療師

真的在幫老者治抽筋呀!

我一路走下山, 遇見亞x哥, 正在運送狗糧上山, 

再落海灣興記士多, 那裡收養了好多流浪狗, 

這位好心人是義工, 他真的是位大好人啊! 可惜我要趕船, 

如果有時間一定幫他一把.

來到赤徑碼頭, 景色美到不想走啊!

坐在大飛上一路乖風破浪, 沒心情拿相機拍攝喇! 

冇氣又冇力又肚饑, 一路上冇出過聲.

回到黃石第一件事...就是走到售賣機買兩樽水, 

一飲而盡. 再上巴士回西貢去永和吃晚飯.

七個小時在山中轉, 我只掛住影蝶影景, 幾時都喺咁樣子! 

因為平時有識途老馬睇住, 今次我又大安主意, 

終於出事喇! 好似食咗迷藥咁呀! 有地圖冇拎出嚟睇! 

人家問路我冇出主意, 今次一d都冇上心, 

是誰的錯, 重在山上發癲.

在這裡我要多謝行山人曾生、曾太帶路; 

好多謝教會三勇士救急扶危;  好多謝指條好路

俾我哋行嗰位武裝人; 最多謝的是包容我任性的賴太, 

最後是多謝洪仔, 佢好大勇氣的去探路, 

跑上跑落, 怕他心有事啊!

其他的就是天快黑要早d回家, 不用謝了.