受傷匯報一切好好.今日出街喇!

2013年3月3日
在「美」的家人切勿擔心, 一切可好, 看看便知...放心.
話說大年初十拍完南蓮園池這個「圓滿閣」...

轉身見一剛學行的小BB一個站在我面前,
笑得可愛, 但又不見有大人在,
於是左右張望代為找尋, 誰不知當轉左時,
一不留神踏到凸起一寸的水渠邊...
咁就出事喇! 啪的一聲我就應聲倒地, 但都要力保相機啊!
右腳拗柴, 左腳隨即跪下, 褲管都擦破一個洞啊! 
即時, 那些躲起來的大人就走出來了! 連聲說不好意思,
累我分神喇! 原來他們躲起來看小孩子怕不怕,
即時心裡媽媽聲啦! 那是什麼家長呀?! 
園警問我如何, 要不要幫忙, 我說唔好掂我, 由我自己檢查,
當時喺好痛, 裡面受創當然在內滲血, 但無即時腫脹,
立即叫妹妹截了的士, 打電話俾骨醫, 經過一輪檢查,
沒有骨裂, 又再推瘀鬆筋, 痛到打醫師啊!
上藥包扎後回家.

別以為包得靚靚, 其實舉步為艱呀! 痛到死去活來. 醫師知我回家後就沒法出門, 所以給我四服藥自己敷.
第二日, 打開睇吓, 好痛但都唔喺咁腫啫!  
咁我就自己換藥, 又包扎好固定下來...
跟住落去...怕肉酸就唔好睇喇!  
第四日, 打開繃帶...C喇! 腫到象蹄咁! D瘀浮哂出嚟!
對中藥敏感呀!!!  唔可以敷跌打藥喇!  
於是妹妹提意煲去瘀茶啦! 好呀! 我受得, 快去買;
咁就買咗六劑, 隔日煲一劑分兩之次飲, 好有效呀!
再用「喜療妥」去瘀, 腳踝部份就用西藥塗抹.
等D敏感退咗就貼自己一向用開的膏布, 好止痛o架!

第五日, 自己睇到都怕怕呀! 我未見過咁醜樣o架!
第六日, 開始試吓行! 好痛! 而且每晚都痛到瞓唔到,
 嗰種痛楚非筆墨能形容, 只可說痛在心裡口難開啊!
以後的一個星期內...冇拍照喇!
我一個在家, 妹妹有電話慰問, 見我好轉中, 放心喇! 
我每天按摩、換藥三次.
一切盡在我掌握之中, 閃電段好轉過來了. 第十二日, 我終於冇哂瘀喇! 趕快拍下打報告先.  
跟著落街散步時, 立即去藥房買了「護踝帶」.
回家立即帶上, 要帶最少兩星期作固定保護.

咁又俾我過關喇! 睇了一次骨醫, 在推瘀同鬆筋時的
痛楚, 我永世難忘啊!
依家在家中走動自如, 但落街行要加倍小心,
行一陣就好攰啊! 下星期要回健身班拉筋先掂喇!
以後一定要帶眼行路, 要做好心都要慢慢嚟呀!!!